احيانا يجب ان تبني حولك جدار للعزلة لترى من سيهدمه ليراك ..
.
.
بـارت -15- من قصة "قـسَـر الـرواسَـن"
صفنت عليه وكتله .. لأي درجه، واصل انت
ابتسم وكال .. لدرجه ،رقمها قياسي ماموجود بس بالخيال
رفعت حواجبي، وضليت اباوعله وهو كذلك يباوعلي بأبتسامه عدلت فانيلتي وكتلة .. يجي يوم واخليك تحجي واصيرك مرهم واداويلك جرح جرح
ضحك باستهزاء وكال .. واثقة من نفسج
باوعتله بثقة .. اكيد غير انتَ، العلمتني الثقة لو لا
ابتسم وكال .. تأثير الثقة المبالغة، هو انحياز راسخ حيث تكون ثقة الفرد واعتماده على أحكامه الشخصية أكبر، من دقة وموضوعية تلك الأحكام، خاصًة عندما تكون الثقة كبيرة نسبيًا.
لا تبالغين بثقتج ..
ضحكت وكتلة .. بكرا تندم يكميل
ابتسم ويباوعلي بنظرات تخبل هيج اريد اشلع، عيونه الخضر دك بوس وارجعهن، ههههههه خرب ولله صايرة ،متوحشة
انوب اشرلي وكال .. خلي نبلش، بالانكليزي جيبي
كمت جبت الانكليزي وكعدت بصفة كال .. شنو انطوج ،تحضير؟
-الاساسيات
هز راسه وكال .. حلوو يعني، بعدكم مامبلشين بالقواعد العميق
فتحت عيوني ع وسعهن .. لا بربك، اكو اعمق من هذا
ضحك وكال .. اعمققق واعمق، الى العميق هههههههه
ضحكت وكتلة .. خوفتني
-لا لا تخافين انتِ سباعية مايخوفنج هذني
هو شنو الماضي البسيط والمستمر والمضارع البسيط والمستمر والمستقبل (Future)
عكدت حواجبي وكتله .. شني هذا الفيوچر ينوچل ينشرب
كام يضحك بصوت عالي وكال .. خرب يومج يعني انتِ ماتكعدين الا تحششين
-هههههه يلا ولله بعد ماقاطعك كمل
حمحم وراد يرجع يدرسني وجان يتذكر السالفة ورجع ضحك وعض شفتة عدل كعدته ورجع يدرسني .. باعي ،انتم حالياً ماواصلين لهاي ،المواضيع اخذتوا بس الاساسيات وانتِ تكولين كلشي ماتعرفين بالانكليزي فـ نبلش بالاحرف
شوفي راح اكتبهم الج كلهن، وتطلعين ع يوتيوب اغُنية الاحرف الانكليزية وهيج تحفظيهن
-شنو هاي الاغنية
-اكو اُغنية ع يوتيوب كُلش حلوة للاحرف الانكليزية تسهلج الحفظ هسة احنه نكدر بدقائق نحفظ اغنية بس مانكدر نحفظ درس لان ،الدراسة نوعاً ما مُملة فـ نحاول ندرس بهاي الطرق الحلوة
هزيت راسي .. تمام
كتبلي الاحرف وكال .. كذلك راح اكتبلج الارقام لحد رقم 20 ،لا اقل ولا اكثر حتى يساعدنج بدرس the Time (الوقت) وهم للرياضيات وهم تضبطين الانكليزي
كتبهم الية بدفترة مسودة
وكال .. الانكليزي لهنا تمام ضبطي، الاحرف والارقام وتكدرين نوب تسيطرين وية المدرسين
نوب يا مادة
كتله .. الرياضيات
-شنو تحضيرج
-التمارين
-اجباري؟
هزيت راسي بـ لا .. لا بس كال الاستاذ ،حلوهم حتى اصحح اخطاءكم
-اذاً مو اجباري فـ باجر شي اكيد راح يعيد ،الموضوع لان اول شرح بس كـ مفهوم الاساسيات
وركزي ويا كُلش زين واذا كذلك مافتهمتي تعاليلي افهمج
-خوش وبعد الجغرافية ربتلي علة صارلي من ساعه بـ ٧ لحد هسة الساعه بـ عشرة احفظ وانسة
-السبب ماتكتبين بالدفتر وماتفصلين الموضوع وماتقرين بصوت عالي
عكدت حواجبي .. شلون يعني
عدل كعدته وكال .. شوفي من تقرين بصوت عالي تحفظ عيونج واذنج ولسانج، فـ اذا نسيتي فد تعريف يتذكره عيونج ،او واحد من الاعضاء الي ذكرتهم الج
والاساتذة ينصحون بالقراءة بالصوت العالي
والكتابة بالدفتر تحفظج، الموضوع و يترسخ براسج أكثر ،التعريف اذا عدتي فد 5 مرات بعد مستحييل تنسينه،واضافًة الى تفصيل الموضوع مثلاً نهر دجلة
تسوين عليه فد عشر أسئلة تلخصين بي نهر دجلة
مثلاً
كم طول نهر دجلة؟
من اين ينبع؟
واين يلتقي بنهر الفرات؟
وكذلك ....
راح يضل الموضوع براسج وهذني التلخصيات موجودة بالملزمه واذا تحبين تلخصين بيدج وتطلعين اسئلة واجاوبة بكيفج بعد
هزيت راسي .. حلوو
- اي وهاي الطريقة تستخدميها وية كل المواد الدرخية
كتله .. تمام والعربي كذلك؟
رفع راسه باوعلي صفن ع شفتي وانا ضليت صافنه بوجهة حمحم هو وكال .. العربي القصايد اكو ع شكل اغاني ع يوتيوب كلش حلوة وياها، عزف هادئ كُل قصيدة ينطوها الج نزليها اغنية وطول اليوم حطي سماعات بأذنج وافتري بالبيت وبنهاية اليوم راح تلاحظين نفسج حافظتها
وبالنسبة للقواعد ،هذا شرح ع الاساتذة والي ماتفتهمينة كذلك ،حاجيني وتدللين
هزيت راسي .. تمام شكراً ولله جنت حايرة وماعرف ،شسوي حتى فقدت الامل بكلشي
رد .. لا كُل ما تفقدين الامل تذكري حلمج، والدفتر الي اشتريته الج هم يزيدج الهام
- اي كُل يوم جاي اكتب ورقة هو بي 365 ورقة سنة كاملة
هز راسه .. اي يلة بعد تحتاجين شي
-لا سلامتك واكرر شكري الك
أشر ع عيونه وكال .. تدللين من عيوني
هو كام وانا احس من توتر احتريت نظراته تجلط
ماعرف شلون يباوع نوب عيونه حلوه مدري شبيه افهة كباله طاح حضي بلشت اقرأ جغرافية ع الطريقة الي علمني عليها لاحظت نفسي داركز والشرح يبقى براسي حمدت ربي وشكرتة رجع املي واهسي بالدراسه
خلصت الي اكدر عليه ورحت نمت
ثاني يوم طلعت للدوام اخذني السائق ،وصلت بالبداية افتريت بالمعهد اندليت اماكن فارغه وحلوة عجبني الهدوء فـ كعدت اقرأ جغرافية
ونوب اشتريت باكيت عصير شربتة ورحت للصف
شوية ودخلت مُدرسة، الجغرافية لابسة بنطرون كابوي ،وقميص احمر وفوكه جاكيته صفرة وحذاء صفرة وشعرها مخصلته ،اصفر
وفهد ابد مايكعد راحه سمعته كال بصوت ناصي .. طالعه جنهة ماعون زلاطة
عضيت شفتي ودنكت راسي، بس جوان وعسل كامن يرفسن وايديهن ع حلكهن واسامة كاعد بصف فهد دخل ع خط وكال .. من تمشي يكلك كرندايزر (شخصية كارتونيه)
حاولت الزم نفسي انا الحمدلله ،ماطلعت صوت بس عسل وجوان طلعت صوت شهكتهن مال ضحك
باوعتلهن ام الجغرافية وكالت .. خيررر ماما شبيجن تضحكن مو عيب انا واكفه وانتن هيج، تضحكن
ردت عسل بتوتر .. اعذرينه ست حقج علينه ،بس جوان جلب قيطان حذائها حشاج بالرحلة وكمنه نضحك
باوعتلهن بنظرة مو حلوة ودارت ،وجهة سمعت صوت طكت علج درت وجهي شفت فهد يعلج
واسامة ياكل جبس باوعلي فهد وصغر خشمه بحركه مال اطفال وأسامه قدملي الجبس ابتسمت ودرت وجهي
رجعت اباوع للمدرسة بلشت، تشرح تحضيرنه ونوب سألت سؤال انا اعرف جوابة رفعت ايدي
كومتني بس انا جنت كُلش مرتبكة اول مرة اجرب هيج شعور فـ خربطت بالجواب ونصة مامفهوم بس انا اعرفة وخربطت لان مرتبكة جان تكلي .. اذا ماتعرفين المن رافعه ايدج؟
رديت .. لا ست اعرف الجواب بس شوية ارتبكت
باوعت صفح وكالت .. شنو راح اكص راسج مثلاً
رفعت حواجبي ورديت عليها .. لا ست شحده اليكص راسي بس كتلج مرتبكة
ضلت تباوعلي بنظرة ماعاجبها وجان تكول بنترة .. كعدي
انا ضغطت ع ايدي احاول اصبر نفسي وياها
ماريد مشاكل ،من اول اسبوع ،اريد تتعارك وية كل الطلاب حتى يصير الحق النه
نوب سألت سؤال ثاني وكامت ابنية اسمها مرسلين
جوابتها بس نست كم كلمة جان تكللها .. احفظي الجواب عدل يالله تكومين
كالت .. ست هي كم كلمة نسيتها شسالفة هاي بالوزاري اصلاً مايحاسبوني عليها
-منو كلجج مايحاسبون انتم وزاري حتى ع نقطة تتحاسبون
ردت .. ست احنه ثالث، مو سادس حتى نهتم لهاي الدرجه علمود المعدل واذا التعريف عليه ١٠ درجات ونسيت كم كلمة ينطوني ٨ او ٩
جان تنتر .. هسةة شنو انت تجادليني
كالتلها .. لا ست انتِ الي بلشتي قبل شوية الطالبة كامت، مرتبكة وحقها غير اول مرة وهسة انا هم
-يلا كعدي كافي تجادليين
خلت مرسلين وكعدت
جان المدرسة باوعت لفهد وكومتة يشرح المادة
وهو جاب نهر دجله، ع الفرات ع هور الحمار ع المزروعات ،خبط الدنيا خبط واسامة شبعه تكريص
وعسل وجوان كوة لازمات نفسهن والمدرسة تباوعله وفاتحه حلكها لمن كالتله .. انتتتَ تحجي صددك
جاوبها بثقة اتمنيت عندي رُبع من عدها .. نعم ست ليش شبي الشرح مالتي
كالتله .. شوداككك، للمزروعات هاي بنهاية الكورس الاول بعددنه احنه بدجلة وشطفرك ع الفرات
رد .. مو ست انا احفظ فوك الواجب مالتج واجب ثاني غير شاطر
نترت .. لااا ماريددد واجب ثاني اريدك تحضر بسس الواجب الي انطي
هز راسه .. تدللين ست منا وهيج ان شاء الله
صاحت بصوت .. سمعووني كلكم ترة انا اسجل اسماء الي مايحضرر اريددد تحضير واذا تبقون بهذا مستواكم ندز ع أهالي
الكل كال نعم ست واصلاً الصف مالتنة شرار الكل محضر بس هي لازم تعلق ع كُل واحد وتطلع بي عيب طلعت ام الجغرافية ،وردت اطلع جان اسمع فهد يكول .. ست جعجوعه ولا تستقر
كاموا يضحكون وانا خليت وطلعت كعدت بنفس المكان الهدوء لمن بدأ درس، الرياضيات دخلنه جان يجينة الاستاذ جواد سلم وكال .. شلونهم طلابي اليوم نشااااط موو ماريد نحوول شباااب نحول ماريد
كال فهد .. لا استاذذي احنه شعبة نارر وشرار
ابتسم و رد .. عفية بطلابي يلاا شباب قدمو ايديكم ليكدام وغمضوا عيونكم بُسررعه، ماريد واحد يفتح الي يفتح ازعل ويا
سوينه مثل ماكال وجان يكول .. سحبوا شهيق من انفكم واطرحوا ،من فمكم بس تأخروا بسحب الشهيق مو بسرعه
سويت مثل ماكال واحس صار نشاط حلو نوب كال
فتحوا عيونكم ،فتحنة عيونه جان يروح يفتح الشبابيك
ورجع كال .. غمضوا عيونكم لمدة خمس دقائق وتأملوا وتخيلوا ،نفسكم باجر عكبة من تتخرجون شنو راح تصيرون
تخيلت لابسة الابكوت وافتر بالمستشفى ابتسمت لا ارادياً
فزيت ع صوت الاستاذ كال .. فتحوا عيونكم ابوية انا هنا مو بس استاذ انطي ،دروس بالرياضيات فقط انا هُنا لاطور تفكيركم وانمي عقلكم وافتح باب السعادة لحياتكم لان، انا اعتبركم مثل اولادي واشوف بيكم مستقبل عظيم
خلي احجيلك شوية عن حياتي وندخل بالمادة حتى نوب قبل الدرس بـ ١٠ دقائق ننطي نصائح ونشارك حياة بعض ،انا والدي الله يرحمة جان يريدني اصير دكتور جراح ،شاطر حتى يتفاخر بية وينغر امام اخوته بس انا جنت احب ادخُل طب نفسي
لان احُب هذا القسم ،بس جان والدي وجميع اهلي يستهزون بيه ع انو اطباء النفس كلهم مجانين وبيهم حالة نفسية والي بيهم انتحروا والي بقة مخبل
بس انا هذا الحلم يكبر وياي ومااهتميت لاي شخص
لمن وصلت للسادس، وذبيت كُل تعبي بي وقبل امتحانات اخر السنه توفه والدي وحييل انكسر ضهري من بعده جان يطب ويطلع يصيح لحد يحجي وية جواد ،جاي يدرس وكلساع يدخل الغرفتي محمل جميع انواع الفواكه والكرزات خو الجوز وين مادور وجهي اشوفة وبالليل احس عليه يغطيني ويمسد ع راسي
المهم وفاة ،والدي كسرتني وجانت اجوبتي بالامتحانات مو زينه يعني ماتجيب ذاك المعدل مال الطب
لمن استلمت نتيجتي ،ناجح ومعدلي ناصي كلهم انكلبوا عليه وحوش وصاروا يستهزون بيه ويكولون مو ع اساس ابوك يريدك دكتور شو ع هذا المعدل كُلشي مايقبلك، اطلع عمالة احسلك
بس انا جنت انسان صاامد مايهمني كلام الناس
طبيت كُلية تربية والكل يستهز بية وتحملت كُل كلامهم الي يسم البدن وبعدها تخرجت ودرست ماجستير وصرت دكتور جامعي بس مو بأختصاصي لا ،بأختصاص الارشاد حلمي، ماتركته استمريت اقرأ كتب واطور ذاتي ودخلت معهد واستلمت شهادة التنمية البشرية ،وكمت اقدم محاضرات بالكلية وانعرفت بدكتور الايجابية جميع الاساتذة، يطلبون نصيحتي واكو طالبة قصتها طويلة جداً يجي يوم واحجيها الكم كدرت اعالجها وحالياً هي دكتور جامعية وياي ،صرت ادرس طلاب بمعهد وانطيهم تنمية ذاتية ،ودكتور جامعي اختصاصي الارشاد والتنمية
المختصر من قصتي هو مو كلشي نريدة لازم يصير بالمضبوط مرات اختياراتكم تكون خطأ
وربي سبحانه وتعالى يختارلكم الصح
"وعسى ان تكرهوا شيئاً وهو خيراً لكم"
والدي جان يريدني جراح شاطر
وانا اريد دكتور نفسي
وبالاخير صرت مدرس رياضيات واستاذ جامعي وكلشش احُب مهتني وافتخر بيها ودوم احمد ربي واشكره ،وبنفس الوقت صلحت هواي ناس، وبعدني ع هذا الطريق مادام ربي سبحانه وتعالى وياي
فـ انتم اتعبوا ع نفسكم وسوا الي، عليكم والباقي ع الله وعسى ربي مايخيب ضنكم
وها قبل لا انسى اكو طالبة هنا اسمها .. رواسن عُثمان
وكفت وكتلة .. نعم استاذ
باوعلي بأبتسامه وكال .. ها هلا بيج بابا تفضلي كعدي
ستغربت ليش سأل عني المهم كعدت
وهو كام يعيد شرح البارحه واخذ، الفرصة وكومنه واحد واحد ، لان احنه اعدادنه قليلة
الحمدلله كدرت افتهم نوعاً، ما ومن ارجع اعيد كُل الشرح ،طلع الاستاذ جواد ودخل ورا الاستاذ علي ابو الانكليزي ،شكد يحشش يموتنه من الضحك وهو وفهد اصدقاء واحد يرفع والثاني يكبس
شرح موضوع قواعد كُلش سهل كال .. تدرون هذا عليه كم درجه
جان يحجي بجدية يعني مو بشقه فـ احنه فتحنه عيونه وركزنه ويا وعبالنه ١٠ او اكثر جان يجاوبه اسامة .. استاذ ٥ او ١٠
ضحك استاذ علي وكال بأستهزاء .. درجه وحدة كوة بالدفرات ينطوكم
كمنه نضحك وهو يهز بيدة .. ٥ درجات شنو ولله انتَ نايم هذا اذا رادوا يساعدوكم يجيبولكم منه بس بنفس الوقت الدرجه كُلش ناصية اذا كان من ضمن القواعد درجتين بس اذا من ضمن الاملاء كتلك بالمچاتل والمدافر يالله ينطوك درجة وحدة
هذا الاستاذ كُلش درسة ممتع اولاً يشرح حلو ومفهوم وثانياً يضحكنه ويغير روتين الدرس
نوب كتب مثال ع صبورة وكال اريد واحد يكوم
كلها رفعت ايديها بس انا جنت خانسة لان متوترة وماريد اكوم وافشل نفسي جان يباوعلي وكال .. لكفتج الخانسة كومي يلا
ضحكت بتوتر وهو اصر يكومني
تقدمت وكفت ع صبورة انطاني، القلم حليت المثال وباوعتله بخوف ،خاف يطلع غلط جان يباوع للحل وعكد حاجبة ورجع باوعلي وهز راسة بمعنى ليش هيج ،انا اصفر وجهي مدري شجاني
جان يضحك بصوت وكال .. صحيح الحل شبيج راح توكعين من الخوف
كتله .. نظراتك ماطمئن
ضحك .. خرعتج مو
هزيت راسي .. كُلش
رجع ضحك واشرلي اكعد ،رجعت كعدت ونوب كوم فهد
وهم باوعلة بنفس الطريقة وجان يكلة فهد .. هاا استاذ ترة انا مو رواسن وتخوفني بهاي النظرات
ضحك الاستاذ وكال .. كفووو من شاربك
كمش شواربه فهد وكال .. راح اوصل للبيت ازينهن
كمنه نضحك وهو ضرب ع كتفة وكال ارجع ،خلص درس استاذ علي طلع
وبعدها خلص الدوام اخذت جنطتي وطلعت لكيت السائق بالباب رجعت للبيت بهاء ماموجود وداكتو يم الحرس تغديت وكعدت بالصاله احجي ويا ميسم ع موبايل لمن جابت سيرة اسيل بنت عمي ع أساس متعاركه ويه نجوى وصايرات من رأس
كلتلها .. شوصل نجوى لبيت عمي عاكف؟
ردت .. مادري هي بعدها تروحلهم بس مو دوم
_ وع شنو متعاركات!
_ ماقبلت خاله نجوى تكُلي بس اسيل غير كاتلتها كتله بحيث وجهة كله خراميش
_ مبين نجوى مسويتلها عمله وياها وأسيل وكحهههه كلشش
كامت تضحك .. مو اوكح منج رواسن منو فشخها بطابوكه
_ ليش مانكول بسببها عاكف طفه الجكاره برجلي،وبسببها كص شعري ولادي بحيث من يومها كمت احس نفسي ولد
تنهدت .. الله ياخذلج حقج منهم ،اي شلونه وضعج ويه بهاءالدين
_ نفسه مجرد تقربنه بصفه اصدقاء
_ اهم شي مامأذيج
_ لو مأذيني تتوقعين نصير اصدقاء غير اجزعه العافيه
ضحكت .. اي مو اكول مبين سمسم وياج
تنهدت .. الله كريم نشوف تاليها
سديت الموبايل منها وضليت اكلب بالموبايل لمن دخل بهاء باوعلي مبتسم تقرب عليه ومد ايده للسلام باوعتله بنظرة بيها ابتسامة ومديت ايدي رديت السلام كمشها هو عصرها بيدة ودنك باسها استحيت سحبتها ورجعت ليوره شافني مستغربة من طريقة السلام جان يكول .. هاي طريقة السلام تدل عن ان الشخص مسالم ويحب السلام
ابتسمت وكتله .. حلوو لعد نوب منو اشوفه اسلم عليه بهاي الطريقة
جان يكول .. ايي بس مو باجر الكاج كُل طالب او استاذ تشوفينه تمدين ايدج للسلام ع انُ انتِ مُسالمه
ضحكت بصوت .. لا يمعود مو هل ثخون
ابتسم وتقرب مسح ع خدي بطرف أيده
همس .. غمازتج حلوه
ضليت صافنه بعيونه انربط لساني رجع همس .. جنت اكللهم ركزولي ع غمازه اريد الصور بيها غمازاتها
بس ماحصلت غير صوره وحده لأن ماتضحكين بسهوله صور دموعج عندي اكثر من غمازتج وهذا جان هم من همومي بس حالياً رنت ضحكتج جاي مو بس تشيل همومي تمحي ماضي هم
كمشت أيده وخرتها وكتله .. انتَ جنت سبب دموعي
رفع حواجبه .. شلون واني جنت أسعى واذب كل جهدي في سبيل راحتج
- بالعكس جنت أذيه بالنسبه الي بس حالياً جاي ينضف كلبي اتجاهك
ابتسم .. الحمدلله
مر من يمي يريد يروح وجان يتقصد يطخ أيده بيدي غمضت عيني حيل ورجعت راسي ليوره
ثاني يوم كذلك طلعت للدوام جان اول درس استاذ جواد
كال .. اليوم ست جليلة مدرسة الجغرافية ماخذة أجازة فـ كلت اسألكم تحبون اخذ محاضرتها لو تردون تطلعون بيها لان انتم مامجبورين بهاي المحاضرات مال تنمية فقط، مبادرة مني فـ اذا ماتحبون احجوا بابا لا تضلون ساكتين
كالت مرسلين .. لا استاذ اخذها ، اصلاً ننتظر محاضرتك ع نار
كملتها عسل .. اي ولله استاذ نتمنى ماتخلص كُلش نحب محاضراتك
كام الصف كلة وأيدوا ع محاضرات مال تنمية ف كال .. اول محاضرة الي ورابع محاضرة مال ست جليلة فـ راح اخذ محاضرتي للتنمية لان اول محاضرة وكـ نشاط والمحاضرة الثانية للرياضيات ماشي بابا
الكل وافقوا
فـ كال .. يلا خلي نتحدث بخصوص التسامح من اهم المواضيع من بعد الحُب
قوة التسامح
يقول البعض ،إن التسامح ضعف ولكنه على عكس ما يقولون فالتسامح ،قوة
يقول غاندي: إن التسامح ،من سمات الأقوياء.
وهذه القوة تكمن فيك لأنك تكتم غيظك فأنت قوي لأنك تستطيع أن تتغلب على نفسك, وأنتَ قوي لأنك تستطيع أن تقف ،في وجه من ظلمك ولكنك تسامحه لأن الله طلب منك هذا، فأنت قوي بقدرتك على طاعة الله والخوف من عقابه.
ضليت صافنه عليه ومامتقبلة كلامة رفعت ايدي جان يبتسم وكال .. نعم رواسن تفضلي تضيفين شي فوك الموضوع؟
كتله .. استاذ واذا كانوا اشخاص من المستحيل نكدر نسامحهم لان اذيتهم ماتنسي
كال .. راح تأذين نفسج هيج ماتأذين غيرج
كتله .. شلون؟
-عدم التسامح يجعل طاقة الإنسان طاقة، سلبية وتفكيره سلبيًا ويُرغب الإنسان في الانتقام ممن حوله.
التسامح ليس بينك، وبين العبد ولكن هذا التسامح هو شيء بينك وبين الله تعالى وهو فرصة لتقترب من الله أكثر وأكثر, وهو يريح القلب والعقل; لأنك عندما تسامح من حولك أو من يؤذيك فأنت لا تنشغل بالتفكير فيما فعله، فيك وكيف آذاك وكيف تؤذيه ولكنك تسامحه فتريح القلب من الغل والحقد والحسد, وتريح العقل من التفكير فيما يرد إليك اعتبارك وماذا تفعل معه.
التسامح والغفران هما أساس، الطاقة المجردة النقية, وهما أساس المستقبل المشرق لأنك تتعلم من مشاكل الناس ما يصلح حالك مع الله ومع الناس.
هناك ما يسمى العقل التحليلي والعقل العاطفي, فالعقل التحليلي يجعل الإنسان يكتشف كيف يستخدم كل شيء في الوقت المناسب, لأنه هو الذي يحلل هو الذي يتعامل بالمنطق, هو الذي يأخذ الطاقة الموجودة في العقل العاطفي ويحولها إلى معلومات ومنطق إيجابي يستخدمه، الإنسان لتحقيق أهدافه, أما العقل العاطفي فهو المسئول عن الطاقة وعن الهروب من المواقف الصعبة ،أو الهجوم في المواقف اللازم فيها الهجوم, ولكن ليس فيه معلومات عن أي شيء.
التسامح هو الصفاء ،والنقاء الداخلي فعليك بالتسامح أولاً بأول حتى تنظف ما بداخلك فتكون إنسانًا نظيف السريرة نقي القلب والجوهر والظاهر, فعليك بالتسامح ولا تشغل نفسك بالكيد والغل، والحقد حتى تفرغ طاقتك للحُب ولتحقيق أهدافك وآمالك ولتنال حب الله وغفرانه.
ضليت ساكته وهو ابتسم ابتسامتة حلو وطاقة ايجابية هو كلش جبير كلششش يطلع بنهاية الـ ٥٠
هز راسة بمعنى كعدي ،ورجع يحجي
من فوائد التسامح
١.روحانياً،انتَ بالتسامح قريب من الله قريب ،من عفو الله قريب من الناس من حولك وعندما يأتي الليل وانتَ متسامح مع الكل فـ انتَ تجهز نفسك اذا مت لرضوان الله عنك
٢.صحياً،انت بعدم التسامح تجعل المعدة تخرج احماضاً ،والاحماض تؤذي المعدة
حتى ان العلماء اخذوا هذا الاحماض ووضعوها في طعام الفئران فماتت فهذا الاحماض تؤذي المعدة، وتؤذيك صحياً ،كذلك العقل فـ هو دائماً مشغول بعدم بالتسامح وكيف تؤذي هذا الشخص وكيف تقف في وجهة
التسامح علاج لقصور الماضي ،وعون في المستقبل
اذا لمن تسامح الماض،ي فستظل تحمله طيل حياتك فوق اكتافك فأذا لم تسامح الماضي وتتعلم منه فأنت المخطئ وسوف تضل في مكانك واقفاً تتقدم خطوة للامام خطوة واحدة
والى هُنا تنتهي محاضرتي
طفر فهد .. لا استاذ كمل اخذ الفرصة ولله موضوعك حلو
كال .. ماكدر وليدي عندي محاضرة ثانيه الطلاب السادس يلة طلابي فكروا بالموضوع وتقدموا للامام لا تبقون بنفس الحفرة المظلمة ،واضافًة اريدكم تحضرولي مواضيع حلوة نتناقش بيها بالايام المُقبلة
وابحثوا عن التسامح اكثر ماشي
خلصنه باقي المحاضرات وانا صافنه بموضوع التسامح
طلعت من، المعهد تعبانه كُلش شفت السائق ماموجود، انتظرته خمس دقائق مااجه وانا منا مطنكرة كمت وكفت تكسي وكتلة يوصلني بداية المنطقة
صدك ولله وصلت، باوعت للطريق اتذكر اطب منا ونوب من هذا الفرع انا حافظه بغداد حفظ بس هاي المناطق الراقيه ماندل بيهن المهم لمن، وكفت حايرة بين فرعين يالله يا فرع الي يدل ع بيت بهاء ليش هذا الشارع ماشايفته
تنهدت خايفه انا، شسويت لو متصلة ع بهاء شجاني باوعت للشارع صارو كبالي ثنين شباب مرتجين ع سيارة وجاي يحجون
رحت الهم من، شافوني توقفو عن الكلام واحد كال .. تفضلي اختي محتاجه شي
كتله .. ولو زحمة عليك تندل بيت بهاء الـدين الـمجيد
هز راسه .. اي شلون، ماندله دخلي بهذا الفرع وامشي لكدام تلكين بيت عالي هذا بيته
-تمام شكرا
طبيت بالفرع الي ،كالي عليه وصدك شفت سيارة بهاء من بعيد عرفت انا اجيت من الفرع الثاني والسائق وبهاء جانوا يطلعون من شارع مختصر
كمت اركض وفرحااانه لكيت البيت مامصدكة داركض وجان اشوف بهاء طلع ،من البيت يركض للسيارة
عرفته خابرة السائق رفعت ايدي وصحت
بهااااااء
جان يلتفتلي عيونه حمررررر ،وجهة مكلوب كلاب انا شفت وجهة هيج اختفت ابتسامتي وخنست
.
.
.
.
.
للحكاية بقية
الكاتبة،،،،،رباب حيدر