# رواية_ لمة العيله💙
# الحلقة _ 2
الكاتبه "اميرة اغسطس ✍🏻
__________________________
محمود : طلعت برا عشان نولع سبسي شفت سيارة خاشه عرفتهم وصلوا طفيت سبسي ومشيت نستقبل فيهم ونرحب بهم
سماح : شكلهم وصلوا نسمع في دوشه برا
سند: هاك سفرة الشاهي وطلع يجري
منى: بالشوي ياولد رك اطيح وانت ديما تجري
اني: سمحه تهبلي غير جيبلي وشاح بنطلع برا
ساجده:تحسابي روحك فرخه زي زمان تطلعي برا🙄
جمانة : منو اللي بيطلع برا خشي دخل واتي ميه اكيد عطشانين بيشربو ميه مصقعه حمو اليوم
رجب : الحمد لله على السلامه تفضل يا ولدي
حسام : الله يسلمك
محمود : تعبتو في الطريق ولا عادي
حسام : لا عادي
ضحى : كيف حالك يا بوي
رجب : الله يسلمك يا بنتي الحمدلله على سلامتكم
ضحى: الله يسلمك اني بنخش نسلم عليهم دخل عن اذنكم تو
سليم : حقو في سند كيف يرفع فـ اياد هههههههه
اياد : نزلني كلهم يحقو فينا 🙂
سند : خليهم بينا 😂😂
ايمن : العقل زينه
محمود : وانت زينة العقل مشاء الله عليك
ايوب : واني ياجدي شنو
رجب : لالا انت قاعد طايش
ايوب : قوله يا بوي كيف نعاون فيك وديما نروح بكري وانوض من الصبح
حسام : ات جدك يبصر عليك وانت متكنطي ديما
اياد: مشاء الله على العضلات اني كنت زيك
سند :خيرك مولي سمين شكلك معاش تتمرن
اياد : سيبت نادي رياضي ليا شهر
سند : ليش خيرك
اياد : بعدين تو نهدرزو خلينا نسلم على باقي العيله
نختصرلكم
كملنا السلام والترحيب وخشو كلهم داخل الرجاله في المربوعة ونحنا في الصالة واني شفت ايوب من شق الباب لما يسلم على جدي ساجده الفرحه هذي كله عشان عمتي ضحى ولا في شي ثاني ؟
اني: شنو قصدك 🙄
ساجده : انتي فهمتي عليا ماتبيش تقولي براحتك
اني: خلي نسكر باب المطبخ مرات حد يسمعنا
ساجده : قولي شكله في شي ثانيه ؟
اني : هو تبي الصراحه اي اني معجبه بـ ايوب
ساجده: اصلا واضحه عليك عرفتك من وجهك
اني : كيف قصد واضح عليا يا حشمتي وخلاص 🤭
ساجده : وجهك قاعد احمر زي طماطم يا فرخه😁
اني: باهي سادك تسويهك عليا كذابه 🙂
منى: خيركم مسكرين الباب عليكم
ساجده : قمريه سكرته
اني فنصت فيها بمعنى اسكتي ما تقولي لحد 🤐
منى : واتيه السفرة طلعوا السلايط من الثلاجه رك تنسوهن وطلعن البخشات من الدرج
ساجده : خلاص ماما امشي قعمزي بحدهم
اني : اي مرت عمي كله واتي انتي ارتاحي بس
ضحى: وين منى ؟
سماح : اكيد مشت تشوف البنات في المطبخ
ضحى : تعبنكم امعانا اليوم
جمانة : لا تعب لا شي هذا واجبنا
حنتي قمريه : زمان لما نمشي عند هلي لما كنتو صغيرين نرفع فيكم امعايا يرحبوا فينا بكل الخيرات الغدي بالمشروب نذكر زمان مشروب شيشه امتاع القزاز مش زي تو احكاك وطوبوات وطاسة الشاهي بالنعناع بعد الواجبة مع الكاكويه عالة الشاهي تقعمز عليها حياة امي الله يرحمها
ضحى : اي نذكر فيها زمان نلعبوا حتى مع صغار الجيران ولما نخشو داخل ناخد في كاكويه بس وتقولنا الشاهي مافيش للكبار بس 😂
سماح : اي ايام النيه الصافيه والقلوب البيضه☺️
جمانة : اي الوقت يجري تغير معاش زي زمان
منى : جيل تو ما يعرفو شي خاطي النوم والنت🙂
نختصرلكم
تغدينا ودرنا سفرة لتريس برا حطينا الكسكسي وفوقه الفلفل الملقي والبطاطا والباذنجان ومغطي بـ لحم الوطني سمح ومع العصبان ودرنا الموالح على جنب البيتزا والبرويك جميع والمسير و سلاطة الفلفل مع الجبنه وسلاطه العاديه طماطم وخيار
بعد الغداء ضيفانا الفواكه موز وتفاح وانجاص وبعدين قهوة وحلويات بالشكلاطه ومقروض معسل وبعدين عصير ومع باسطي وبعدين شاهي وكاكويه
___________________________
العشيه
اني قررت نشوف ايوب لازم اندير سبله ولا اي لقطة عشان نشوفو بعضنا قعدها نفكر وسارحه..
ساجده : نكلم فيك يا فرخه ردي وين سارحه
اني: هااا ايوه امعاك خيرك شن قلتي
ساجده : خيرك ما شربتي عصيرك كملتي نحنا كلنا شربنا وكملنا وانتي من بكري مساكه طاستك قاعده معبيه اشربي فسيع بنرفع السفرة
اني: هاك خودي اصلا معاش نبي وبعدين انتي مش تراجي فيا عاجبك الهدرزة امعاهم وعابيه عليا انوض نغسلهن لكن مانيش نايضه
ساجده : من قالك عابيه عليك يا بايره 😏
ايمن : اني بنطلع ندهور تمشي امعايا
ايوب : نمشي امعاك خير من الكساد هنا بروحي كلهم طلوع جت عليا اني اياد مشي مع سند إلى النادي وبوي طلع مع خوالي وجدي
ايمن : مفتاح السيارة عندك ؟
ايوب : لا مرات قاعد فيها امشي شوفها تو ندور هنا
اني خطرت عليا فكره نضت وطلعت برا على اساس نبي خيط الشحن بناخد من المربوعة المهم لبسة وشاحي ومافيش حد حس عليا طلعت ومشيت المربوعة طول وهنا نلقى ايوب في وجهي
ايوب : من انتي وخيرك جايه تجري
اني : قتله بكل ثقه بنت خالك معرفتنيش تو
ايوب : اها قصدك المجنونه قمرية 😂😂
اني : بارد اخطني اصلا مش جايتك ايوه وفي خاطري بنموت كان ما شفتك اليوم 🥺
ايوب : شن تبي نبصر عليك بس مشاء الله كبرتي وتغيرت زمان خليت صغيره مشفشفه
اني: اي كبرت امالا بنقعد ديما صغيره جايه بناخد خيط الشحن نسيت امتاعي في الحوش
ايوب : شنو نوعه خيط سامسونج ولا ايفون
اني : سامسونج
ايوب : خودي امتاعي اهو سامسونج اصلي يشحن بسرعه راه تلفوني تو مشحون خودي اشحني به
اني : صحيت شكراً تلقى عند امك بعدين
ايوب : تمام
تحسو حب من طرف واحد صح كان قمريه هي بس اللي تحب ايوب لان يعامل فيها بجفاف فهل هذا الحب سيستمر ام النصيب له راي اخر ..
____________________________________
في الليل
درنا العشي بازين وتعشينا كلنا وغسلنا الاماعين
جمانة : ساعه كم تو ؟
ضحى : ساعه 11 تو و خمسه دقايق
جمانة : يا بنت نوضي واتي دبشك بتروحي امعايا الليله
ضحى : خليها تبات الليله خيركم مروحين
جمانة : لالا منقدرش نبيها تساعدني نضمو الحوش يبي مسح والدبش يبي غسل والتحديد خليها تروح
اني : باهي يا ماما خلينا لعند
ضحى : بعد تكملي حوستك تعالي هدرزي غدوه
اني : حاضر يا عميمه
ساجده : خودي امعاك السفرة امتاعكم
اني : بينا خليها عندكم مرات تستحقوها بكره
ساجده : تمام
منى : امتى بتجي صاحبتك
حنتي قمرية : قاتلي بتجي بكره هي وبنات ولدها
ضحى : منو صاحبتك هذي يا امي ؟
حنتى قمرية :غزالة عيت فلان
ضحى : مشاء الله قاعده حيه نحسابه ماتت من زمان مش قالو مريضه وجاه فايروس الكرونا
منى : جاه خفيف هي واخده يبراة التطعيم لانه ضد الفايروس تعبت فترة وصحت
ضحى : مش مشيت حتى زمان قالي عندهم حالة وفاة منو اللي مات نحسابه هي ماتت
حنتي قمريه : كنته اللي ماتت بمرض خبيث عفانا الله واياكم انشاء الله
جمانة : تصبحو على خير بالسلامة
الكل : تلاقي الخير
_____________________
في مكان ثاني..
غزالة: غدوه بنمشي عند صحبتي قمريه
منار : عادي نمشي امعاك
غزالة : عادي ليش لا يا بنيتي بعد يروح بوكم من العمل نقول كان فاضي يرفعنا
ميسم : اني عندي دوره مانقدرش نمشي امعاكم
منار : ومن قالك امشي امعانا انتي
ميسم : منااااار فوتني بالله عليك 😤
منار : اصلا بنفوتك حتنى ماشيه مع حنتي🙂
غزالة : مزال تتعاركو زي صغار سادكم
ميسم : بالله عليك حنتي خوديها امعاك وريحني
غزالة : بنمشي بعد العصر يروح بوكم ويتغداء ويرقد وبعدين نمشو منو عليها الغداء اليوم
منار : اني عليا الغداء شنو تبي انديرلكم
غزالة : دري شربه ناكلوها بخبزة التنور
ميسم : ياريت ماما قاعده امعانا 🥺
غزالة : لها شهرين متوفيه ربي يرحمها كانت طيبه
ميسم : الايام يجرو يجري ربي يرحمها ويصبرنا
غزالة : تعالي بنتي ونزلت منها دمعة على بناته حست بيهم كيف يعانو من فقد امهم 😖
تعالو شوف شنو صار قبل..
وليد : إن لله وإن اليه راجعون
غزالة : ربي يصبرك انشاء الله ويحفظلك بنياتك
وليد : انشاء الله هي تبي شي امي
غزالة : خلاص مرتك قريب اطق الاربعين وبناتك صغيرات يبو من يهتم به واني واعره عليا نربيهم
وليد : ساهل يا امي يصير خير انشاء الله
غزالة : خلي ندورلك على بنت الحلال تربي بناتك وتفتح حوشك وترجع لعملك زي قبل هذا حال دنيا
وليد : شن تبي يقولو الناس عليا مرته ما سكرت شهرين وماشي يتزوج
غزالة : مش قلناش دير عرس احني عائليه نمشي اني وحده من البنات نجبيوها وتم
منار : اي بابا لازم تتزوج
وليد : مصدوم ف بنته سمعت كلامهم انتي امتى هنا
منار : من لما قلت شن تبي يقولو الناس
وليد : هكي عجب تو سمعت البنت
غزالة : خليها تسمع اصلا بنمشي اني وياها نخطبولك
منار : كلام الناس خلي اخر همك نحنا نبو مرأة تعوضنا عن ماما الله يرحمها
ميسم : صح وحتى ماما قبل ما تموت قتلك تزوج مسامحاتك وكانت هذي وصية ماما الله يرحمها
وليد : تعالو عندي حضن بناته ويبكي ربي يحفظكم
غزالة : تاثرت من الموقف تبكي مشت لدراها
وليد : بس توعدوني تهتمو بقريتكم وما تخلو شي يتاثر عليكم اي شي تبو كلموني نوفرهلكم
منار ومسيم : سلامتك يا بابا ربي يخليك لينا
وليد : ديرو بالكم على حنتكم اني طالع تو
منار : شنو تبي انديرولك العشي
وليد : ما اديرو شي تو نجيب من المطعم
مسيم : فرحت احلى بابا في العالم
نسيت نعرفكم وليد عمره 56سنة مرته هبه توفت بسبب مرض خبيث عفانا الله واياكم وعند زوز بناته ميسم عمرها 23 سنة ومنار عمرها 21سنة عايشين مع حنتهم غزالة عمرها 75 سنة
فات اسبوع
دور عشي عشان اربعين هبه وعطو للجوامع عشي وجو الجيران وكل اقاربهم ، واقف وليد على الزواج وامه ادورله في عروسه..
______________________
يوم جديد
ايوب : صباح الخير جدي
رجب : صباح النور نايض بكري اليوم شن عندك
ايوب : اليوم بنمشي نجيبلكم الخبزه وعندي مشورا
رجب : ارتاح تو محمود يجيبها امعاه لما يروح
ايوب : اصلا اني طالع تو تبي شي في خاطري ديما هكي شيابين دوشتهم واجد زعم لما نقعد شيباني بنولي زي جدي تو..😂😂
ساجده : ياماما مزال اسبوع ويقروا تو فاتحين تجديد القيد اني بنمشي نجدد القيد وانزل المواد لكن خايفه السنة عندي مشروع التخرج
منى : وانتي وين شفتي هذا من قالك ؟
ساجده : يا ماما منزلين منشور عالنت شفته
منى : كلمي بوك يرفعك كان فاضي وانتي من يوم قريتي يا بنتي تخلي فيا ديما بروحي والله ما نحبه القرايا بكل اللي تاخد فيك مني كان نلقاك تقعدي امعايا نفكر حتى كان تزوجتي كيف يصير فيا🥺
ساجده : تاثرت بكلام ماما وجيت حضنتها لان ديما تحبني ومتعوده علياا وتخاف يجي يوم ونخليها بس هذي سنة الحياة يا ماما واني مستحيل نتخلى عليك انتي روحي ونبض قلبي خلاص معاش تبكي 🥺❤️
سند : يشوف وساكت اني مافيش حد يحبني 🙄
منى : امتى جيت يا فرخ
سند : حتى اني نبي حنان وجو الاحضان مش بس ساجده اللي 24 ساعه واني مسكينه اختك تاعبه تقرأ تضم غير شنو اللي درت زياد زيها زي باقي البنات راه 🙂
ساجده : وانت خيرك تغااار قولي شنو مضايقك
منى : اسكتي وامشي كملي شغلك وانت تعال امعايا في الدار نبي نحكي امعاك كلمتين بروحنا
ضحى: ايوه اي جبتهم تو نطلع نعطيهلك خليك جنب الباب امتاع الحوش
ايمن : يا ماما مطوليش بس راهو بنطلع مستعجل
ضحى : دقايق بس وانت ديما طاير
ايمن : فتح تلفونه واتصل بصاحبه يجي يطلعو جميع لان سيارة عند ايوب
ضحى : خود هاك وانت ديما صرفك هلباا كان تنقص اشوي جايتك قرايا بعدين تستحقهم
ايمن : اصلا خديتهن تو نردهالك اول ما انضم اموري لقيت شغل تو ماشي مع صاحبي بنشوف ونحكي مع راجل نتفاهمو ادعيلي يا ماما هي تبي شي
ضحى : سلامتك ياولدي ربي يوفقك
نختصرلكم
جي ايوب جاب امعاه الخبزه وفطور مع بعضهم وطلع سند مع اياد لنادي وبابا قعمز مع جدي وعمي وحسام راجل عمتي يحكو يخطوو يبو يطلعوا زرده العيله كله لان جو سمح ربيع وعندنا استراحه اتجنن
________________________
العشية
سماح : اهلين تفضلي كيف حالك اليوم
جمانة : بخير جت المرأة ولا مزال
سماح : مزال خشي مقعمزين في الدار
اني : كيف حالك عميمه اليوم
سماح : بخير شنو جايبه امعاك
اني : كيكه بالنتوتيلا
سماح : تهبل يعطيك الصحه
اني : بنمشي نحطها في الكوجينة وين ساجده
سماح : مش عارفه
اني : خشيت داخل وحطيت الكيكة وجيت سلمت عليهم في الدار وما لقيتش ساجده مشيت عندها في دارها لقيته وقعدنا نحكو هي مش عارفه شنو تلبس واني طبعا لبسه سروال جينز ارزق وبلوزه ورديه مع اشوي ميكاب ولف شعري شنو رايك فيا
ساجده : انتي اي شي تلبسي يطلع عليك سمح
اني : عارفه روحي 😎
ساجده : لكن اني مافيش شي نلبس سمح😖
اني : واسعي غادي وخلينا نطلع لك لبسه على ذوقي
ساجده : هااا افتحي حتى الشطنه فيها دبش
اني : اوميقاد عندك لبسه هذي وتقولي مافيش شي نلبس امتى خديتها هي اول مرة نشوفها عندك 🙂
ساجده : قاعده من زمان جاب ليا بابا
اني : امشي البسي وشوفي روحك كيف تطلع عليك
ساجده : خدت لبسه ومشت تبدل في الحمام
اني : تجنن عليك شوفي روحك قدام المرايا
جاكه خضراء مع بلوزه بيضه وقونه خضراء لون الاخضر بصراحة ماشيه امعاك موضه تو لون الاخضر
شكلهم الضيوف وصلوا خلينا نطلوع نسلمو
ساجده : انتي اطلعي واتيه اني مزال بندير لمسات خفيفه ونلحق عليك
منى : تفضلي مرحبتين بيك
غزالة : يزيد فضلك يا بنيتي
منى : تفضلي خشي تو يجو البنات وتتعرفي عليهم
منار : يزيد فضلك خالتي
ضحى : يا اهلين ومرحبتين بضيوف الغالية
غزالة : مرحبتين بيك
نختصرلكم
كملنا السلام كلنا والحق اني ما عجبتني البنت اللي جايها بكل منعرفش ليش حسيت دمها ثقيل وعميمه ضحى عاجبتها وتشكر فيها طول الوقت واني الحق خفت تاخدها لـ ايوب والله نقتلها كان تفكر تاخد مني ايوب ليا اني وبس و المرأة تشكر في عميمه سماح وعاجبتها انشاء الله غير مش تبي تاخدها لولدها 😳
غزالة : مشاء الله سنة كم تقرأ تو
منى : السنة هذي اخر عام وتتخرج
غزالة : ربي يوفقها ويحفظها لك
منار : اندد اختى يا امي
غزالة : حقا اختك ميسم السنة بتتخرج هذا عليش تو ما جت امعانا عندها دوره العشيه تقرأ
حنتى قمريه : وقت تو مافيش حد ما يقرأ نحنا زمان عندنا البنت ماتعرفش غير الطنجرة بس
غزالة : جيل تو يقرو حتى بصغارهم
ضحى : اي والله جارتي في غريان تقرأ مع بنتها يمشو جميع ويروحو جميع
منى : تخيلوا نمشي مع بنتي تو نقرا ههههه
اني : نضت طول خشيت الحمام نبكي واجعني كيف يحكو على القرايا واني سيبتها وكان مستوي ممتاز
جمانة : حست على بنته نضت ادور فيها
سماح : توتي في سفرة العصير والكيكه
ساجده : وانتي شنو تقري تو
منار: اني نقرا في قانون
ساجده : يقولو القانون واعر هلبا
منار : اني ناخد في كورسات وقت الصيف
ساجده : باهي اكويس بالتوفيق والنجاح انشاء الله
سماح : خاشه بسفرة العصير وبدت تضيف فيهم من اليمين مقعمزه حنتى قمرية وجنبها غزالة
غزالة: تعتبي روحك يا بنتي
سماح : تعبك راحه يا عمتي
نتخصرلكم
طول الوقت وغزالة عينها على سكاح عاجبتها ولما جت بتروح سالت حنتي قمرية بنتك سماح مخطوبة ولا لا وقتله لالا والحق حنتى قمريه فرحت لبنتها انشاء الله ربي يسخر نصيبها وعميمه ضحى تمدح في منار واني بنموت معاش كيف ندير من ناحية واجعني حالي وكيف تخليت عن قريتي ومن ناحية ايوب كيف بنخلي عميمه تخطبله منار بس قررت نحكي مع ايوب ونقوله كله شي..
___________________________
في الليل
رجب : شنو صار في الرزده بتمشو يوم الجمعة
محمود : اني فاضي معدنيش شغل نمشي
سليم : اصلا عطله ومافيش حد عند شغل
حسام : خلاص اتفقو وكملوا العيله داخل ساعه كم بتمشو الصبح بكري ولا بعد صلاة الجمعة
رجب : نمشو الصبح بكري ونروح في الليل
يتبع..
____________________________
توقعاتكم الحلقة الجايه !
هل وليد يوافق على كلامه امه ؟
شنو بتقول قمريه الى ايوب ؟
هل العيله كلها بتمشي لزرده ولا لا ؟
هذا كله بتعرفو جاوبه بعدين ..
اكتبولي رايكم في تعليقات حبايب قلبي 🥺
"مع تحياتي اميرة اغسطس ✍🏻