????? ????? ????

دخل هو وياها لطبقة اللي تحت ..مشات جلست  وهو وطلع الفوق عند خيرة لقاها خارجة من البالكون تتنشر الفوطات..

سفيان: خارجة بداك شعر هكاك ؟

خيرة: (عقدت حجبانها ) مالك جيتي دابا ؟ شنو نسيتي..

سفيان: مانسيت والو كاينين ضياف التحت..

خيرة: (علات حاجبها) شكون ؟

سفيان: مرت كمال..

خيرة:  (باستغراب )شنوو ؟ علاش جات !!

شفيان: معرفت يمكن مقلقة شوية وصافي..

خيرة: اهاه مقلقة وحنا مالنا؟

سفيان: (خنزر فيها) كيفاش حنا مالنا؟؟

خيرة: زعما لا مقلقة شنو غانديرو ليها..

سفيان: شكوون كاليك ديري ليها؟؟ ضيفة من عائلتي تهلاي فيهااا حتى  تمشي بحالها .. شنو جاتك صعيبة؟؟

خيرة: (تنهدت )  مرحبا بيها... انزل نسلم عليها... تطلع معايا هنا...

سفيان: وهكاك الله يرضي عليك .. سيدة حاملة ومقلقة داك تخربيق لي بيناتكم ما نبغيهش يتجبد .. بلا متقلقيني منك...

خيرة: اشمن تخربيق؟ واش انا بنت صغيرة تتوصيني على ضيافك؟؟ هبلتي اسفيان..

سفيان: وانا غير گلت... خاصاك شي حاجة؟

خيرة: (فتحات لباب تنزل) لا

سفيان: (مشى موراها نازل) تفكري لا خصاك شي حاجة كتبيلي فالواتساب.. متخلينيش تاندخل وتخرجيني...

خرج لخدمتو .. وهي دخلات عند سهيلة  ، لقاتها جالسة  .. سلمات عليها تتسول على حالها و حال البيبي عاطياها صوابها حيث من عائلتو وصافي...

سهيلة : سمح ليا جيتك بلا منعلمك 

خيرة :(تبسمت) ماتقوليش هاكا..كيدرتي مع الحمل..

سهيلة :(تنهدت)  شوية راكي عارفة..فين ياقوتة ؟

خيرة :  كاينة عند باها..متجي حتى الغدا..

سهيلة :(تدور عينيها ممرتاحاش في الجلسة) اه مزياان.

دوزات عندهم هداك النهار .. عطاتها خيرة وقت وتهلات فيها .. واخا هي كانت باغية غير تنعس وما تبقاش تتفكر .. كلاها التفكير والهم.. بقات فاتحة عينيها تتقلب فبلاصتها يدها تحت كرشها .. حتى اذن الفجر عاد غفات .. فاقت لوقت معطل لقات خيرة تتسناها للفطور .. فطرات معاها وناضت باش تمشي .. ما تقدررش تبقى عندهوم كثر من هاكا... وهي تتلبس حوايجها.. جات عندها خيرة مزال طيليفون في يدها...

خيرة: صونالي سفيان .. قالو كمال غايجي موراك دبا شوية...

سهيلة: وااخ (تترتب شعرها قبالة المرايا) تجيه في القلب ان شاء الله...