Shafaq? (Completed)

3rd person's p.o.v:-
Nikkah ke baad ek baar phir gaari mein baithe tau iss baar ek ajeeb si khamoshi thi, Adbaan ko surprisingly Mashal ke kehne pe, wahin chor diya tha magar wo shakhs jaate jaate Mashal ke maa baap ko uski nafarmaani aur 'pasand ki shaadi' ke baare mein sab bata dene ka waada karke gaya tha aur woh bus yehi dua karti rahi thi ke uske ammi abbu yaad rakhein ke unki beti youn kisi larkay ke liye unki aankhoun mein dhool jhonk de, ye uska qirdaar na tha

Safar ab shuru hua tha tau Mashal ki sochoun ne ek aur rukh le liya tha, wo ye ke kiya Zawaar akele rehta hoga? Ya apne maa baap ke saath? Agar saath rehtay hein tau unka kiya reaction hoga? Aur kiya ab usse ek anjaan aadmi ke saath uske kamre tak mein rehna parra tha, ek aesa shakhs jiske qirdaar tak pe usse bharosa nahi tha? Uske maa baap se kiya woh kabhi mil paaye gi doobara? Agar mil paaye gi tau kiya unhe apne paak daaman honay pe yaqeen dila sakay gi? Jahan woh ja rahi thi uske saath wahan kaisa salook hoga, iss sab ke aagay ek bohat barra sawaliya nishaan tha

Zawaar ka haal bhi Mashal se kuch khaas mukhtalif na tha, halanke unke khiyalaat baraqs they, Zawaar ko tarah tarah ke khiyaalat aa rahay they ke woh apne maa baap ko iss sab ki kiya wajah bataye ga? Kiya uski ammi jo pehle he uss se kaafi hadd tak bad-dil thein, kiya woh uske sach ko sach maanein gi? Kiya uski baat par koyi bharosa karay ga? Kiya uske be daagh kirdaar pe kisi aur ko bachanay ki wajah se dhabba tau nahi lagaya jaye ga, kiya woh apni safai mein koyi saboot paish kar sakay ga? Kiya usse apne maa baap ko bhi saboot paish karne ki zaroorat paray gi? Zawaar jahan inn khiyalat ki zanjeeroun mein jakra wa tha wahin gaari chalate chalate uski nazar apne saath bethi uss sehmi huyi jaan pe parri thi jiss se uska wajood ab munsalik ho chuka tha. Saadi shalwar qameez ke oopar kaali chaadar ourhay, khirki se baahir dekhti woh larki ab uskay dimaagh mein kuch kuch sama rahi thi, woh apne se ziada uske liye fikarmand ho raha tha, iss liye nahi ke usse uss se muhabbat honay lag gayi thi balke iss liye kiyonke ab woh uski zimedaari ban chuki thi aur Zawaar apni zimedaariyan ache se nibhaanay ki kohshish karta tha. Usse khiyaal aa raha tha unki aagay ki zindagi ke baaray mein, Kiya duniya walon ke be-jaa andaazoun aur sawalat se woh usse tahafuz de paye ga? Kiya ye rishta jo ek mehez majboori ke tehet bana tha, kiya ye qaim rahay ga? Kiya woh sab aanay wali mushkilaat ka saath saamna kar payein ge? In sab sochoun ke darmiyaan agar usse ek sakoon tha tau woh ye ke usse ye darr nahi tha ke uske ghar walay Mashal ko kiya kahein ge woh jaanta tha ke woh jitne bhi naraz houn, wo saare gillay uss se he karein ge, Mashal se nahi. Kiyonke wo usse daantne ka haq rakhte they, Mashal ko nahi aur bilfarz agar wo kuch keh bhi detay tau woh jaanta tha ke woh kamazkam uspe uthti ungliyon ko neeche karne ki taaqat rakhta he tha, woh khud zamanay ki dhoop jhelne ko tayaar tha lekin usse tapish ka ehsaas na honay dene ki kohshish karne ka tau woh waada karke aaya tha aur iss soch ke peeche chupa khayaal uski behen ka tha, ke waise he jaise aaj agar uski jagha koyi shakhs uski behen ko youn muhafiz ban kar izzat se apna leta tamasha dekhne ke bajaye tau wo usse dhoondhte zamaanay bhar ki khaak na chaan raha hota. Woh uss ke naam ke siwa kuch nahi jaanta tha, magar uss se juray faraiz ko adaa karne ke liye wo sab kuch jaanana zaroori nahi samajhta tha.

Mashal's p.o.v:-

"Mein Islamabad mein rehta houn, waise rehta akela houn lekin ittefaqan issi hafte ammi abbu mere paas he aaye we they tau aaj ghar par woh moujood hongay, khair abhi kaafi safar baqi hai, i think kuch le lete hein khaane ke liye, im sorry mujhe pehle khayaal he nahi aaya"Kaafi daer ke khaamosh safar ke baad mujhe mere saath se ek awaaz ne mujhe mutawajah kiya tha

"Nahi, koyi masla nahi mujhe bhook nahi hai" Meine chota sa jawab diya tha, shayad kuch ziada bolne ki himmat he ab nahi rahi thi

"Aap kahan rehti thein? Agar aap batate huye comfortable houn" Zawaar ne hichkichatay huye sawaal kiya tha

"Mein bhi apne parents ke saath Islamabad mein he rehti houn, par wo mere ek relative ki shaadi ke liye London gaye we hein aur unki ghair moujoodki ka he faida utha- khair,jab tak wo aa nahi jaatay tab tak aap mujhe agar apne ghar mein panah de dein-" mein bol he rahi thi ke Zawaar ne meri baat kaati thi