???? ?? ??? ???? ????"????? ?????"

في بيت الشيخ محمد
صحى من النوم وهو يتذكر وش صار امس يتذكر العيون البريئه والانامل الصغيره اللي كانت متمسكه فيه وتصيح بأنهيار!، التفت حوله ومالقاها طلع برا غرفته يدور عليها وصل للحوش لقى امه تفطر وقدامها رُوح و شيّم يلعبون، قرب فهد ببتسامه وجلس مع امه وهو يصبح عليها ويحبّ"يبوس"راسها..
فهد وهو يناظر البنات:افطرتي؟
رُوح:اي افطرت
فهد ضحك:ما سألتس اسأل شيوم
رُوح ببتسامة قهر:افااا والله وراحت اهميتي عندك ياعمي
ونطقت رُوح وهي تدغدغ بطن شيّم:والاهتمام راح لتس يالحلوه
ابعد عنها شيم وهي تضحك وتوجهت لفهد
شيّم وهي ترجع خصلاتها البنيه خلف اذنها:لا بفطر معك
فهد مسح على راسها واخذ قطعه من الخبز وهو يأخذ من البيض ويأكلها، واندمجوا بالسوالف والضحك وبعدها انضموا لهم محمد وصقر وكملوا دردشه..
محمد وهو ساند على عكازه:الا يافهد ذي البنت وش نهايتها؟
فهد شبك حواجبه من مداخلة ابوه واردف وهو يناظر رُوح:ادخلوا داخل
اخذت رُوح شيّم وتوجهوا للداخل
فهد وهو مدرك ان امها مب جايه:يبه البنت بأمانتي لين تجي امها
محمد تنهد واردف بعدها:وان ماجت؟
فهد:وان ماجت هذاني احلف لكم، والذي نفسه بيدي البنت ماتطلع من البيت الا مع امها
وشد على اخر كلامها وهو يردف:وبأثبات مقنع!
محمد وهو يقوم:الولد انهبل
وجه محمد كلامه لموضي:عقلي ولدتس! ولا ترا بيشوف شي مايعجبه من الناس ومني!
فهد:يبه كلام الناس لايقدم ولايؤخر ولاهو بهامني، اما انت يبه فكر باللي قلته وترا مالي رجعه بكلمتي
اردف فهد بضيق:خلوني اسوي شي يريحني بحياتي ولو مره
محمد بعصبيه:يريحك؟ يريحك تجي تربي بنت عندنا بكرا وبعده لا تحرم لي ولاتحرم لك، فهد وش ذالكلام؟ اخبرك عاقل!
طلع محمد خارج البيت وكل ذا الحوار كان تحت انظار موضي وصقر وكانوا ملتزمين الصمت لحاجه وحده! ان ابو صقر مايحب احد يتدخل في حوار مابينه وبين عياله
حبّ صقر راسه امه وهو يودعها واردف:فهد كلامه صح لو انه ما اخذ البنت الكلاب اللي بالشوارع ماتركوها لحالها ولكن بنفس الوقت ابوي صادق! ذي بنت وبكرا تكبر وماتحرم لك انا اشوف نوديها لاحد الحريم العوانس وتكون كبيره بالسن وتوصي عليها
فهد:اخبلت انت؟ والله ما اتركها لأي حد قدها بأمانتي
لحق صقر ابوه وسلمّ فهد على راس امه ودخل يبدل ملابسه وبعد ماطلع شاف رُوح تمشط شعر شيّم
فهد:شيّم مشينا بنطلع
شيّم بخوف:وين؟
فهد:بوديتس السوق
قامت شيّم ومسكت يد فهد اللي كان مادها لها واردف فهد وهو يكلم روُح اللي كانت ترتب المكان بعد ماجلسوا فيه
فهد:رُوح تبين شي من السوق؟
رُوح: لا سلامتكم انتبه لها
فهد:ابشري
وطلع هو وشيّم وتوجهت رُوح للحوش بعد مالبست ملابس المدرسه عشان تاخذ الفطور ولقت كم حرمه من الجيران قاعدين عند موضي يسولفون لها
ام عمر "احد حريم الديره" وهي موجهه كلامها لموضي:ماشاءالله على بنتكم ياموضي ياحظ اللي بياخذها
كانت رُوح تسمعهم وهي تاخذ الاكل بس فضلت انها ماتبين الاهتمام وبعد ما انتهت من حمل الفطور اتجهت لغرفة امها وهي تشوف امها تقرا قران
قربت رُوح لها وهي تبوس راسها وتقعد عندها
رُوح:وشلونتس يمه؟
قفلت حنين المصحف والتفتت لبنتها:الحمدلله بأفضل حال، الصغيره وين هي؟
رُوح:تقصدين شيم؟ اي عمي فهد اخذها للسوق اعتقد بياخذ لها ملابس
حنين:وليه؟، امها ماهي جايه؟
رُوح:مدري يمه بس امس سمعتها تصيح مع عمي وتشاهق واحس ماحد يدري بها الا عمي فهد
حنين:اي الله يصلح حاله يارب
رُوح:امين، تبين شي يمه؟
حنين:جدتس برا؟
رُوح:اي يمه مع الحريم
حنين:اي لا راحوا بروح لها ما ابي اطلع لهم وانا بهالحال وياخذون مني المرض
رُوح:مافيتس الا العافيه يمه
قامت روح واتجهت وهي تلبس عبايتها وخطر ببالها سعود..
اردفت بنرفزه:ليه شايف عمره؟ كريه
واتجهت لخارج البيت وهي متجهه لنقطة تجمع البنات لأنتظار الباص